У мінулыя святочныя выхадныя снежнае надвор’е дазволіла апрануць спартыўную форму і стаць на лыжы. Спартыўнае свята «Калядная лыжня» аб’яднала прыхільнікаў зімовых забаў.
[caption id="attachment_73397" align="aligncenter" width="560"]
■ Старшыня раённага Савета дэпутатаў Ірына Кісляк адкрывае спартыўнае свята[/caption]
На дыстанцыю стадыёна фізкультурна-аздараўленчага цэнтра выйшлі не толькі выхаванцы спартыўных школ раёна, але і шматлікія аматары лыжных гонак з розных арганізацый і структур горада і раёна. Тут можна было ўбачыць прадстаўнікоў райвыканкама, райсавета дэпутатаў, каманды школ, моладзі, медыкаў, прафсаюзаў і ўвогуле усіх, хто неабыякавы да здаровага ладу жыцця. На старт выйшла нават і Снягурка, а бадзёры настрой на працягу забегу ствараў Дзед Мароз.
Для кагосьці першыя метры лыжні — дзіцячая забава, а хтосьці рабіў відавочнае намаганне. Не абыходзілася нават без падзенняў, аднак з дыстанцыі ніхто не сышоў.
На фінішы не было ні пераможцаў, ні тых, хто прайграў. Галоўны крытэрый — удзел і зарад станоўчых эмоцый. Дарэчы, іх яшчэ ў гэты дзень можна было атрымаць падчас катання са снежнай горкі і на катку.
Сяргей КОЗЕЛ
Комментарии