Капыльская дзятва такой колькасці забаў, як сёлета на свяце горада, бадай, яшчэ не бачыла.
Шматлікія надзіманыя горкі, электрамабілі, каруселі і водныя атракцыёны, гандлёвыя кропкі з поп-корнам, марожаным і іншымі ласункамі так і вабілі да сябе хлопчыкаў і дзяўчынак.
З захапленнем яны ўдзельнічалі ў конкурсных праграмах, якія прапаноўвалі аніматары, гулялі ў шашкі і шахматы, спрабавалі выйграць прызы, трапна пападаючы ў паветраныя шарыкі дроцікамі ад дартса. Было шмат жадаючых размаляваць акварэльнымі фарбамі макет любімага горада з кардонных скрынак, выстройваліся чэргі да майстроў аквагрыму.
Але, відаць, самыя яркія эмоцыі падарылі дзецям і іх бацькам капыльскія выратавальнікі.
Яны таксама прыдумалі шмат забаў: можна было паспрабаваць пераадолець перашкоду па спецыяльна нацягнутых вяровачных пераправах, апрануць спецадзенне і сродкі аховы і ў задымленай палатцы (пад наглядам выратавальнікаў) адшукаць «пацярпелага» — мяккую цацку, паспрабаваць збіць струменем вады мяч. З захапленнем самыя маленькія ўдзельнікі свята бегалі басанож па траве, пакрытай пенай, якая была выпушчана з пенаўтваральніка.
А самым яскравым момантам стала «Водная феерыя», якую арганізавалі выратавальнікі.
Комментарии