Памаліцца святому Роху і ўшанаваць памяць памерлых родных і блізкіх на старых («польскіх») могілках у Капылі сабралася шмат людзей. Нягледзячы на спякотнае надвор’е, каля каплічкі былі не толькі вернікі каталіцкай канфесіі з нашага раёна, але і шмат людзей з іншых рэгіёнаў вобласці.
Разам з пробашчам касцёла Святых Пятра і Паўла ў г. Капылі Аляксандрам Тарасевічам у Святой Імшы прыняў удзел святар касцёла Узвышэння Святога Крыжа ў г. Узда Дзяніс Шастаковіч. Вернікі маліліся за святога Роха, які некалі дапамагаў хворым, прасілі ў свайго апекуна здароўя для сябе, сваіх блізкіх, родных. Маліліся і за святую памяць продкаў, якія некалі жылі на гэтай зямлі.
Напрыканцы Імшы айцец Аляксандр падзякаваў мясцовай уладзе за арганізацыю работ па добраўпарадкаванні могілак, за новую, прыгожую браму. Таксама падзяку атрымалі ўсе каталіцкія вернікі за адданасць Святому Касцёлу.
Павел ШЭІН
Комментарии