Адзін за адным ідуць камбайны па шырокай ніве, загон за загонам скошваюць залатое калоссе. Гудуць натомлена маторы магутнай тэхнікі: пакуль не сапсавалася надвор’е, аграрыі спяшаюцца хутчэй сабраць ураджай. Нават, бывае, абедаюць па чарзе: пакуль адзін падсілкоўваецца, другі вядзе камбайн па бязмежным полі.
[caption id="attachment_59529" align="aligncenter" width="580"]
■ Лідары жніва Мікалай і Іван Коршукі, Алег Леановіч, Сяргей Карабейка, Уладзімір Вярбіла і Юрый Новік[/caption]
У нязменных лідарах сельгаспрадпрыемства камбайнер Уладзімір Вярбіла, для якога сёлета гэта ўжо трынаццаты сезон жніва. Як прызнаецца хлебароб, працаваць у пары з вопытным памочнікам Сяргеем Карабейкам і лёгка, і зручна. Экіпаж упэўнены, што пры ўмове ўзаемаразумення і спрыяльнага надвор’я збажына будзе ўбрана ў сціслыя тэрміны і з мінімальнымі стратамі. Іх старанне і гаспадарскі падыход — добры прыклад астатнім удзельнікам жніва.
[caption id="attachment_59527" align="aligncenter" width="400"]
■ Сяргей Шарупіч[/caption]
Сямейны экіпаж у складзе бацькі і сына Мікалая і Івана Коршукаў не адстае ад сваіх таварышаў. Калі для Мікалая Іванавіча сёлетняя ўборачная далёка не першая ў яго жыцці, то для выпускніка Мар’інагорскага сельскагаспадарчага каледжа, а цяпер ужо і студэнта Беларускага аграрна-тэхнічнага ўніверсітэта Івана — добры пачатак для яго азнаямлення з аграрнай справай.
Таксама ў ліку лідараў у гаспадарцы камбайнер Алег Леановіч, а на адвозцы збажыны лепшыя вынікі паказвае вадзіцель Юрый Новік.
Увогуле, усе ўдзельнікі жніва ў КСУП «Доктаравічы» — людзі магутнай волі, вялікай адказнасці і шырокай душы, надзвычай сціплыя. Яны ўвесь светлавы дзень аддаюць сябе высакароднай справе. І толькі кароткі час для адпачынку адрывае іх ад штурвала камбайна.
[caption id="attachment_59525" align="aligncenter" width="580"]
■ Аператары збожжасушылкі Сяргей Новік і Уладзімір Гурын[/caption]
Зерне пасля абмалоту няспыннай плынню паступае на збожжасушыльны комплекс на цэнтральнай сядзібе сельгаспрадпрыемства. Перад пачаткам уборачнай тут быў выкананы рамонт вагавой. У планах — асфальтаванне пляцоўкі, замена даху над складам фуражнага збожжа. Работа на таку вядзецца кругласутачна. За суткі сушыцца ад 180 да 220 тон збожжа. Шчыруюць тут дзве змены аператараў, у якія ўваходзяць Уладзімір Гурын і Сяргей Новік, а таксама Аляксандр Зяневіч і Васіль Савіцкі. Як адзначыў падчас нашай сустрэчы Уладзімір Гурын, чвэрць стагоддзя ён сушыць збожжа. Давялося працаваць на КЗС-10, КЗС-20, асвоіў і сучасную камп’ютарызаваную.
[caption id="attachment_59528" align="aligncenter" width="580"]
■ Падчас абеду ў полі[/caption]
Цікавімся ў суразмоўцы, якія ж умовы створаны для працы.
— Усіх, хто заняты на жніве, забяспечваюць двухразовым харчаваннем, мінеральнай ці пітной вадой, — адказаў Уладзімір Леанідавіч. — Пасля напружанай працы ёсць магчымасць прыняць душ. Рэгулярна падводзяцца вынікі дня. Не пакідаюць нас без увагі ні кіраўнік сельгаспрадпрыемства, ні спецыялісты. Мы заўсёды адчуваем іх падтрымку.
Што ў КСУП «Доктаравічы» сапраўды клапоцяцца пра сваіх працаўнікоў, відавочна. Пра гэта сведчаць элементарныя ўмовы для працы і адпачынку ў мехмайстэрнях. Зараз тут ідзе абустройства Дома механізатара. На дадзены момант рамантуецца топачная, раздзявалка, функцыянуе душавая. У хуткім часе з’явяцца канферэнц-зала і пакой для прыняцця ежы з неабходным абсталяваннем. Будзе наладжана ацяпленне ў памяшканні рамонтнай майстэрні і пабудавана мыечная для тэхнікі.
Карысны адрас:
223915, Мінская вобласць, Капыльскі раён, аграгарадок Новыя Доктаравічы, вуліца Цэнтральная, 42А. Тэлефоны: (8-01719) 47-8-42 (прыёмная), 47-4-16 (дыспетчарская), 47-0-41 (бухгалтэрыя).
— Наша задача — убраць вырашчаны ўраджай своечасова і без страт. Думаю, што да 20 жніўня мы абавязкова справімся, — адзначае дырэктар КСУП «Доктаравічы» Сяргей Шарупіч. — Сёлетні ўраджай нас вельмі радуе: пшаніцы і трыцікале атрымліваем каля 40 ц/га, ячменю і зернебабовых — каля 35 ц/га. Хачу падзякаваць усім героям жніва, спецыялістам за плённую працу ў гэты няпросты год. Вядома, што ўборка пачалася пазней, чым звычайна, ужо хутка трэба пачынаць сяўбу азімых. Усе добра разумеюць, што, як і калі неабходна рабіць, лішні раз нічога тлумачыць не трэба. Увогуле, мы настройваем сябе на пазітыў і адказную працу.
Сяргей КОЗЕЛ
Фота Паўла ШЭІНА
Комментарии