Як адзначыла старшыня сельвыканкама Марыя Стружко, за гэты час у адпаведнасці з праграмай зроблена многае. Напрыклад, заключаны дагаворы па вулічным асвятленні з Капыльскім РЭС, заменены больш чым 100 лямпачак на энергазберагальныя. У мэтах эканоміі фінансаў адключаецца вулічнае асвятленне на летні перыяд. Вываз смецця ад насельніцтва праводзіцца арганізавана. Наладжана пастаянная работа па прадухіленні ўтварэння стыхійных звалак.
3 пачатку года знесена 12 старых і пустуючых будынкаў у аграгарадку Семежава і 1 — у в. Чырвоная Дубрава. Заарана і ўключана ў севазварот 5 га пустуючых прысядзібных участкаў на тэрыторыі сельсавета.
Праведзены падворны абход грамадзян і пастаянна выпісваюцца прадпісанні па навядзенні парадку на прыдамавых тэрыторыях, бо яшчэ ёсць і вяскоўцы, і спадчыннікі, якім неабходна нагадваць пра неабходнасць утрымліваць сваю сядзібу ў належным стане. Для стымулявання насельніцтва аб'яўлены конкурс на лепшае маладзёжнае, ветэранскае падвор'і на тэрыторыі сельсавета і на лепшую вуліцу ў аграгарадку.
Вясной добраўпарадкавана тэрыторыя, заменена агароджа каля брацкай магілы ў Семежаве, праведзены рамонт абеліска і пафарбоўка агароджы ў в. Чырвоная Дубрава. Грамадзянамі па рэкамендацыі сельвыканкама ўстаноўлена 100 пагонных метраў новых платоў у аграгарадку, новы бетонны каля будынка былога лагера «Атлант», пафарбавана 200 п.м на грамадзянскіх могілках.
У цэнтры Семежава збудаваны і засаджаны дзве альпійскія горкі, высаджаны кветкі ўздоўж дарожак і кусты на тэрыторыі сквера, разбіты клумбы каля Цэнтра культуры і вольнага часу.
Многае зроблена падчас васьмі суботнікаў па навядзенні парадку і добраўпарадкаванні замацаваных тэрыторый і могілак: спілаваны 362 дрэвы, прыбрана 66 стыхійных сметнікаў, тэхнікай гаспадаркі пастаянна падбуртоўваюцца існуючыя звалкі.
— Асфальтавае пакрыццё нашых вуліц і дарог далёка не ў належным стане і патрабуе асаблівай увагі, бо ад гэтага залежыць бяспека руху, — адзначыла Марыя Стружко. — Аднак у гэтым годзе нашым сельгаспрадпрыемствам адрамантавана вуліца Гасцінец, прагрэйдзіраваны Лугавая і Загуменная ў Семежаве. Пасля шматлікіх лістоў у ДРБУ № 124 праведзены ямачны рамонт 5 км вуліцы Задвор'е ў в. Чырвоная Дубрава. Безумоўна, шмат зроблена ў гэтым годзе па добраўпарадкаванні. I асноўныя работы выкананы гаспадаркай, дзякуючы кіраўніку ААТ «Семежава» Анатолю Жданеню, з якім заўсёды знаходзім узаемаразуменне.
Перад сельвыканкамам стаіць яшчэ шмат задач, якія неабходна вырашыць. Трэба тэрмінова спілаваць аварыйныя таполі ў п. Калініна: работы будуць праведзены ў бліжэйшы час, усе дакументы гатовы. Таксама неабходна здымаць старыя платы ў в. Філіпавічы. Шмат пустуючых дамоў, у якія ніхто не прыязджае. Для гэтага будуць адшукваць спадчыннікаў, каб атрымаць дазвол на знос.
Таксама на пасяджэнні сельвыканкама разгледжана работа аддзяленняў паштовай сувязі і ААТ «ААБ Беларусбанк» па абслугоўванні насельніцтва. Яна прызнана здавальняючай, заўвагі ў адрас гэтых служб не выказаны.
Сяргей КОЗЕЛ
Комментарии